zeus pongmey cha’DIch

      abrettenus/abretanus: mysiaDaq zeusvaD abrettenus/abretanus ponglu’pu’.

      acraeus/akraios: ‘op Qun tu’lu’, ‘ej HuDmeyDaq chIrghmeychaj tu’lu’pu’. zeus, hera, aphrodite, pallas, artemis, latlhpu’ je chaH Qunvam’e’. acraeus (akraios) ‘oH wa’ Qunpu’vam pong cha’DIch’e’.

      aegiochus: aegis ‘uchbogh vay”e’. zeus athena je gha’cher DIr yoD ‘oH aegis‘e’, ‘ej reH poymar ‘oH yoDvam’e’. kronos jeypu’DI’ zeus, chalmeyDaq Salpu’ zeus, ‘ej pa’ SaltaHvIS, gha’cher be’ lIghtaH. tera’Daq woQ Suqpu’ wa’ zeus loDnI’ (plouton), ‘ej bIQ’a’Daq woQ Suqpu’ latlh zeus loDnI’ (poseidon).

      aegyptius: maSIrDaq zeus quvmoHlu’taHvIS, <aegyptius> ‘oH pongDaj cha’DIch’e’.

      aeneius/aenesius: cephalenia ‘ambayDaq HuD aenosDaq zeus chIrgh tu’lu’pu’; pa’ zeus quvmoHlu’taHvIS, aeneius/aenesius ‘oH pongDaj cha’DIch’e’.

      aeolomorphus: tu’qomDaj choHlaHbogh vay”e’.

      aether/ether: zeus lupongmeH ghuQ chenmoHwI’, pongvam lulo’pu’. aeschylus, ‘ay’ SochmaH: >aithir ghaH zeus‘e’, tera’ ghaH zeus‘e’, chal ghaH zeus‘e’, yIqawtaH, Hochvam ghaH zeus‘e’, ‘ej zeus Dun law’, Hochvam Dun puS.< euripides, ‘ay’ chorghvatlh SochmaH Soch: >bItlhoghpu’be’bogh be’, DuboghmoHpu’ aithir; aithirvaD zeus pong Human Segh.< orpheus zeus van bom, orpheus ‘ay’ wa’vatlh javmaH chorgh, yamtaw mu’tlhegh wa’maH Soch: >vItna’ ‘oH yabDaj’e’, jubbogh aithir.< aithir ‘oH zeus mung’e’ ‘e’ Del orpheus Qun mung lut.

      aethiops: wewbogh vay’, qIjbogh vay’. chios ‘ambayDaq zeus quvmoHlu’taHvIS, pa’ zeus pongvam cha’DIch lo’.

      aetnaeus: aetna HuD tu’lu’, ‘ej rarchuq ‘op Qun, ‘op wIch jeSwI’, HuDvam je. rarchuq je zeus HuDvam je, ‘ej aetnaeus ‘oH Hochvam pong cha’DIch’e’. aetna HuDDaq zeus Hew tu’lu’pu’, ‘ej pa’ zeus quvmoHlu’meH, yupma’ cherlu’pu’. yupma’vamvaD aetnaea ponglu’.

      agamemnon: spartaDaq zeus quvmoHlu’taHvIS, pongvam cha’DIch lo’lu’. rurchuqmo’ zeus agamemnon je, pongvam cha’DIch lo’choHlu’pu’ ‘e’ ‘Ir eustathius, ‘a nger pIm luHar latlh: taHtaHbogh vay’ Del pongvam cha’DIch ‘e’ luHar latlhvam, {agan} {menon} je mu’ yughmo’ agamemnon.

      agathodaemon: Qun QaQ. Soppu’DI’ ‘elaDya’nganpu’, Qunvam luquvmoHmeH, wa’ HIvje’ ghIrep vIychorgh roghlu’pu’bogh lutlhutlh, ‘ach vIychorghvam luDuDpu’be’. arcadiaDaq megalopolis maenalus je rarbogh taw’e’ tu’lu’, ‘ej agathodaemon quvmoHlu’meH, pa’ wa’ chIrgh chenmoHlu’pu’. zeus napbogh pong cha’DIch ‘oH agathodaemon‘e’ ‘e’ ‘Ir pausanias, ‘ach vuDDaj toblaHpu’be’.

      agetor: Qun law’ luponglu’meH, pongvam cha’DIch lo’lu’pu’, ‘ej zeus ponglu’meH, pongvam cha’DIch lo’lu’pu’ je. lacedaemonDaq qaSpu’ je wanI’vam, ‘ej pa’ pongvam cha’DIch lo’lu’pu’, Humanpu’ DevwI’ che’wI’ je ghaHmo’ zeus‘e’, ‘ej zeus DI’onmeyvam chIwlaw’mo’ pongvam cha’DIch. ‘ach latlh nger tu’lu’ je: lacedaemonDaq <agetor> lo’lu’pu’, rapmo’ <agetor> <agamemnon> je. apollo ponglu’meH, pongvam cha’DIch lo’lu’pu’ je, ‘ej hermes ponglu’meH, pongvam cha’DIch lo’lu’pu’ je. bIng qo’Daq Heghpu’wI’pu’ qeng hermes, ‘ej megalopolisDaq hermes agetor Hew tu’lu’pu’.

      agonius/agonios: ‘op Qun lurItlu’meH, pongvam cha’DIch lo’lu’pu’. ghu’ Qatlh DIghtaHvIS nuv, qoj qaD DIghtaHvIS, nuvvam luQaHmo’ zeus apollo je, Qunvam luponglu’meH, agonius/agonios lo’pu’ aeschylus sophocles je. ‘ach Hoch Sar qaDmey SeQ rangmo’ hermes, motlh hermes‘e’ rItlu’taHvIS, pongvam cha’DIch lo’lu’.

      agoraeus/agoraea/agoraia/agoraios: ‘elaDya’ tIQDaq ngevwI’pu’ DaqDaq ghom nuvpu’, ‘ej ‘op QunvaD nuvpu’vam QanwI’ luDamlu’. zeus, athena, artemis, hermes je chaH ‘op Qunvam’e’, ‘ej agoraeus/agoraea/agoraia/agoraios ‘oH wa’ Qunpu’vam pong cha’DIch’e’.

      aigidouchos/aigiochos: zeus jaghpu’, Qunpu’ vuvHa’bogh nuvpu’ je HajchoHmoH aegis, ‘ej aegis qengmo’ zeus, pongvam cha’DIch tu’lu’. ‘ach jaS Har latlhpu’: zeus je’pu’ wa’ gha’cher, ‘ej ngoDvam Del aigidouchos, {aix} {oche} je yughmo’ pongvam cha’DIch. ngervam luHar latlhvam.

      alastor: ta’mey mIghmo’ DIvchugh vay’, noD zeus. ngoDvam Del pongvam cha’DIch ‘e’ Har hesychius, ‘ach pongvam cha’DIch latlh lo’ tu’lu’ je: ‘op Qun ‘op daemons je tu’lu’, ‘ej latlhpu’ QIHchugh vay’, noD Qunpu’vam/daemonsvam. Sarvam Deppu’ DelmeH ‘op, lot lutmey qonwI’pu’ je, pongvam cha’DIch luwIvpu’. pongvam lu’lo’pu’ ‘opvam, ‘ach pongvam cha’DIch lulo’qu’pu’ lot lutmey qonwI’.

      alexicacus/alexikakos: mIghwI’ ‘ombogh vay”e’. ‘op Qun rIttaHvIS ‘elaDya’nganpu’, pongvam cha’DIch lu’lo’, ‘ej zeus rIttaHvIS je, pongvam lu’lo’ je. apollo luquvmoHtaHvIS athens rewbe’, pongvam cha’DIch lu’lo’pu’ je, ‘ej wa’ wanI’ le’mo’ pongvam lu’lo’choHpu’: qaStaHvIS peloponnese noH, athensDaq qaSchoHpu’ wa’ rop’a’ Sagh. rop’a’vam ngabmoHpu’ apollo ‘e’ luHarmo’ athens rewbe’, apollo lupongmeH, alexicacus/alexikakos lu’lo’pu’ je. heracles ponglu’meH, pongvam cha’DIch lo’lu’pu’ je.

      altius: olympusDaq Daq le’ tu’lu’pu’; pa’ naHmey naHlet Sormey je lupochlu’pu’, watlh Daqvam net Dam, ‘ej DaqvamvaD altis ponglu’pu’. Daqvammo’ zeus pongvam cha’DIch tu’lu’.

      amarius: arkadiaDaq achaeaDaq zeus athena je pongvam cha’DIch lo’lu’pu’.

      ambulius/amboulios, ambulia/amboulia, ambulii/amboulioi: zeus, athena, dioscuri je quvmoHtaHvIS spartans, Qunpu’vamvaD jatlhtaHvIS, pongmeyvam cha’DIch lo’. Qunpu’vam DI’on’e’ luDelbogh pongvam Sovlu’chu’be’, ‘ach chaq <anavallo> ‘oH pongmeyvam cha’DIch mung’e’. wot ‘oH <anavallo‘e’>, ‘ej tlhoS rap <anavallo> {mIm} je. Hegh wanI’ lumImmo’ zeus, athena, dioscuri je, Qunpu’vamvaD jatlhtaHvIS nuvpu’, pongmeyvam cha’DIch lo’.

      ammon: rap zeus, maSIr Qun ammon je ‘e’ luDam ‘op, vaj zeusvaD jatlhtaHvIS, pongvam cha’DIch lu’lo’ je.

      anax: Hoch voDleH; anax (Hoch voDleH) ghaH zeus‘e’.

      anchesmius/anchesmios: atticaDaq wa’ HuD tu’lu’pu’, ‘ej HuDvamvaD anchesmus ponglu’pu’. HuDvamDaq (latlh attica HuDmeyDaq je) zeus Hew tu’lu’pu’, ‘ej anchesmus HuDmo’ pongvam cha’DIch ‘oghlu’pu’.

      anxurus: ‘Italya’ campaniaDaq anxurDaq (bovvam terracinaDaq) wa’ Daq le’ tu’lu’pu’; pa’ naHmey naHlet Sormey je lupochlu’pu’, ‘ej watlh Daqvam net Dam. pa’ zeus chIrgh tu’lu’pu’, ‘ej chIrghvamDaq zeus HojnIy tu’qom quvmoHlu’pu’. zeus chIrghvammo’ zeus pongvam cha’DIch tu’lu’.

      apemius/apemios: vay’ mIgh ‘ombogh vay”e’. atticaDaq parnes HuDDaq zeus apemius/apemios ‘anmoHmeH qachHom tu’lu’pu’, ‘ej pa’ zeusvaD ‘anmoHlu’pu’.

      apesantius/apesantios: apesas HuDDaq (nemeaDaq Sum apesas HuD) zeus apesantius/apesantios chIrgh tu’lu’pu’. perseus ghaH pa’ zeusvaD ‘anmoHpu’bogh nuv wa’DIch’e’ net ‘Ir.

      aphesius: toDwI’/tlhabchoHmoHwI’. che’taHvIS aiakos –peleus vav- voDleH, SISbe’taHmo’, bechtaH ‘elaDya’nganpu’. ngugh aiakosvaD Qun mu’ lu’otHa’lu’pu’, ‘ej aiakos SovmoHlu’pu’: zeusvaD (zeusvaD aiakos vav Damlu’pu’) ‘annISmoH aiakos. vaj HeQpu’ aiakos, ‘ej zeusvaD ‘anmoHpu’DI’, SISchoHpu’, ‘ej Dorpu’ poH QaD. wanI’vammo’ zeusvaD aphesius pongchoHlu’pu’ je.

      aphthitus: HeghlaHbe’bogh vay’, jubbogh vay’.

      apobaterius: tenHa’bogh bIQ’a’ Duj beqpu’ Qanbogh vay’.

      apomyius/apomuios: flies DoHmoHbogh vay”e’. olympiaDaq zeus pongvam cha’DIch lo’lu’pu’. zeus pongvam cha’DIch bopbogh wa’ pa’logh wanI’ tu’lu’: olympiaDaq zeusvaD ‘anmoHtaHvIS heracles, flies ‘Iq tu’lu’, ‘ej heracles lunuQchoHpu’ ghewvam. ngugh ghewmeyvam DoHmoHmeH heracles, zeus apomyiusvaD ‘anchoHmoHpu’, ‘ej SIbI’ HeDchoHpu’ ghewmey; tagha’ alpheius bIQtIqDaq jaHpu’. wanI’vam luSovpu’DI’ eleans, zeus apomyiusvaD ‘anchoHmoHpu’.

      arbius/arbios: creteDaq HuD tu’lu’, HuDvamvaD arbias ponglu’, pa’ zeus quvmoHlu’pu’, ‘ej HuDvam pongmo’ zeus pongvam cha’DIch qonlu’pu’.

      archus apanton: Hoch ra’bogh vay”e’.

      areius/areios: pongvam cha’DIch QIjlu’meH, cha’ nger tu’lu’. nger wa’: <noH bopbogh vay”e’> pongvam cha’DIch QIj mu’tlheghvam, jatlh ngervam. nger cha’: <vangHa’pu’mo’ nuv, QeHchoHpu’ latlh, vaj latlhvam qeHHa’meH, vang nuv wa’DIch> <vay’ QIHpu’chugh nuv, vay’vam QIHpu’bogh yonchoHmoHmeH, vangchoH nuvvam, vaj vay’ nob, qoj toy’choH> Hochvam Del areius/areios, jatlh nger cha’DIch. ‘op pong cha’DIch ghaj je athena, areia ‘oH wa”e’, ‘ej athena pongvam cha’DIch QIjlu’meH, cha’ ngervam rap tu’lu’. pa’logh wa’ loD tu’lu’pu’, ‘ej loDvamvaD oenomaus ponglu’. ‘op puqbe’ ghajpu’ loDvam, ‘ej puqbe’vam tlhogh ‘op loD luneH loDvam; vaj Hoch loDvam qaDpu’ oenomaus, ‘ej Qappu’DI’ oenomaus, Hoch HoH. taghpu’pa’ Hoch qaDvam, zeus areius/areiosvaD ‘anmoHpu’ oenomaus.

      argiceraunus: pe’bIl wov qembogh vay”e’.

      aristaeus: Sub ghaHbogh aristaeus‘e’ bop pongvam cha’DIch.

      arsen: rap ‘elaDya’ <arsen> tlhIngan {loD} je.

      asbamaeus/asbamaios: watlh ‘Ipmey, ‘ej watlhtaH net poQ; ngoQvam chavlu’meH, vang zeus asbamaeus/asbamaios. cappadociaDaq tyana veng tu’lu’pu’, tyanaDaq Sumpu’ asbamaeon puH bIQ Hal, ‘ej DI’on le’ ‘aghpu’ Halvam bIQ. QaH ‘ej belchoHmoH bIQvam ‘e’ lutu’ nuv yuDHa’, ‘ach ‘Ippu’chugh vay’ ‘ej ‘IptaHvIS nepchugh, qoj ‘Ippu’chugh vay’ ‘ej ghIq ‘IpDaj pabHa’choHpu’chugh, nuvvam ropchoHmoH bIQvam. bIQvam tlhutlhchugh Sarvam nuv, ropchoHpu’mo’ mInDu’Daj, lunchoHmo’ porghDaj, ‘ej rIghchoHpu’mo’, bIQ Halvam DoHchoHlaHbe’chu’ nuvvam, vaj HeSDaj DISnISchoHpu’.

      asius/asios: crete ‘ambayDaq asos/oasos veng tu’lu’pu’, ‘ej vengvammo’ zeus pongvam cha’DIch qonlu’pu’.

      astrapaeus: pe’bIl Qachbogh vay”e’.

      atabyrius/ataburios: rhodes ‘ambayDaq atabyris/atabyrion HuD tu’lu’, ‘ej HuDvammo’ zeus pongvam cha’DIch qonlu’pu’. pa’ wa’ zeus chIrgh tu’lu’pu’. chIrghvam chenmoHpu’ wa’ cretan; <althaemenes> ‘oH pongDaj’e’. HuDvamDaq Sorpuq rom’on je tangqa’mey tu’lu’ net Har, ‘ej lIbchoHDI’ wa’ wanI’ le’, ghughchoHpu’ tangqa’meyvam net Har je.

      athous/athoos: ‘elaDya’Daq HuD tu’lu’, HuDvamvaD athos ponglu’, ‘ej HuDvammo’ zeus pongvam cha’DIch qonlu’pu’. HuDvamDaq zeus chIrgh tu’lu’pu’.

      auxetes: ghurmoHbogh vay’.

      baryctupus: tuDbogh vay’, ‘ej tuDtaHvIS, wab vItlh lIng vay’vam.

      basileus: voDleH. zeus DelmeH wa’ van bom, jatlh: > Qunpu’ nuvpu’ je voDleH vav je ghaH zeus‘e’; teH, ‘u’ HochDaq Hoch ‘u’Daq je voDleHpu’ voDleH ghaH; Hoch voDleH, Hoch vav je ghaH. <

      biennius: ‘op kourites tu’lu’, ‘ej biennus ghaH wa”e’. biennusmo’ zeus pongvam cha’DIch qonlu’pu’.

      brontaeus: tuDbogh vay’.

      bulaeus: yej zeus; yej botlhDaq zeus Hew tu’lu’pu’mo’, pongvam cha’DIch qonlu’pu’.

      cappotas: peloponneseDaq gytheionDaq tInbogh nagh tu’lu’pu’, ‘ej not naghvam ghe’moHlu’pu’; naghvamDaq leSpu’ maw’choHpu’bogh orestes, ‘ej pa’ leSpu’DI’, maw’Ha’choHpu’. ghIq naghvamvaD zeus cappotas ponglu’pu’. chaq chunDab ‘oHpu’ naghvam’e’.

      cappotes: chaq <cappotas> Sar pIm ‘oH <cappotes’e’>.

      caraeus: boeotiaDaq zeus quvmoHlu’taHvIS, pongvam lo’lu’pu’ je.

      carius/karios: caria mylassaDaq zeus carius chIrgh tu’lu’pu’. mung rap lughaj carians, lydians, mysians je ‘e’ luHarmo’, nItebHa’ chIrghvam luSeHpu’. thessalyDaq boeotiaDaq je zeus quvmoHlu’taHvIS, pongvam rap cha’DIch lolu’pu’ je.

      casius/kasios: pilousion chanDaq (maSIr Surya’ je veHDaq) kasios HuD tu’lu’, ‘ej pa’ zeus pongvam cha’DIch lo’lu’pu’. kasios HuDDaq zeus chIrgh tu’lu’pu’. pa’ Sum typhon (zeus jagh tIQ), So’taHvIS.

      cataebates/kataibates: pongvam cha’DIch lughaj ‘op Qun. ghIrtaHvIS zeus, tuD ‘ej raw; wanI’vam Dellu’meH, pongvam cha’DIch qonlu’pu’, ‘ej olympiaDaq pongvam cha’DIch zeus ‘anmoHmeH qachmoH tu’lu’pu’. wa’ Daq qIppu’chugh pe’bIl, DaqvamvaD zeus Daq watlh Damlu’pu’, pa’ ghIrpu’ zeus cataebates net Harmo’.

      catharsius/katharsios: watlhchoHmoHwI’. latlh QIHpu’chugh wa’, ruv chavlu’meH, latlhvamvaD vay’ nob wa’vam, qoj toy’; mIwvam chIw je pongvam cha’DIch. olympiaDaq zeus catharsius, nike je chIrgh tu’lu’pu’.

      cenaeus: euboea ‘ambayDaq cenaeum puHley’Daq zeus chIrgh tu’lu’pu’, ‘ej Daqvam pongmo’ zeus pongvam cha’DIch qonlu’pu’. trachiniae much qonpu’ sophocles, ‘ej pa’ SovmoH much qonwI’vam: HochvaD Daqvam ‘anmoHmeH qachHommey leghlaHchu’moHmeH heracles, ghovaD Hoch qachHomvam DechmoHpu’. ghIq zeus cenaeusvaD ‘anchoHmoHpu’.

      cephale: nach.

      ceraunius: tuDbogh pe’bIl Qachbogh vay’.

      chamaizelos zeus: cha’ mu’ yugh pongvam cha’DIch. <chamai> ‘oH wa”e’, ‘ej <zelos> ‘oH latlh’e’. {yavDaq} Del <chamai> ‘ej <neHqu’> Del <zelos>. vaj <yavDaq ghaHtaH neHqu’> Del pongvam cha’DIch. tera’ zeus Del pongvam.

      charidotes: QuchchoHmoHwI’.

      charisius: vay’vaD pongvam cha’DIch qonmoHpu’ elaDya’ mu’ charis. wa’vaD pung ‘agh latlh, ‘ej QaH, vabDot latlhvam raD pagh; ghu’vam bop je <charis> ‘ej ‘uQ’a’meyDaq zeus quvmoHlu’meH, betgham Qoy’lu’taHvIS, zeusvaD zeus charisius ponglu’.

      charmon: arcadiaDaq ‘op zeus pong cha’DIch tu’lu’pu’, ‘ej charmon ‘oHpu’ wa”e’.

      chrysaor: qol’om yan/nuHmey Qachbogh Qun. pongvam cha’DIch lughaj je ‘op Qun (apollo, artemis, demeter je). cariaDaq zeus chrysaor chIrgh tu’lu’pu’, Sep Hoch lulIgh ‘oHpu’ chIrghvam’e’, ‘ej pa’ ghompu’ carians Sep yej.

      cithaeronius: boeotiaDaq cithaeron HuD tu’lu’, ‘ej HuDvam pongmo’ zeus pongvam cha’DIch qonlu’pu’.

      clarius: nuvpu’vaD peSmeH vay’, mIwvam lo’: vogh ‘op ‘ay’ lan vay’vam, ‘ej ‘ay’meyvam leghbe’taHvIS Hoch nuv, wa’ ‘ay’ wIv Hoch; mIwvam chIw pongvam. arcadiaDaq tegaea veng tu’lu’pu’, ‘ej vengvamDaq Sum arcas voDleH puqloDpu’ bopbogh wa’ Daq’e’. ‘op Doch ‘atpu’ arcas puqloDpu’, ‘ej DochmeyDaj tlhIn SuqnISpu’ Hoch puqloD. ngugh wuqmeH puqloDpu’, pa’ mIw chIwbogh clarius pong lu’lo’pu’. wanI’vam DaqDaq zeus pongvam cha’DIch lo’lu’pu’.

      cledonius: tuch ‘otHa’bogh wanI’ qaSmoHbogh vay’.

      conius/konios: pongvam cha’DIch luQIjbogh cha’ DuH tu’lu’: 1. SeychoHmoHbogh vay’, 2. Say’qIS pepbogh vay’. megaraDaq pagh beb zeus conius chIrgh tu’lu’pu’.

      coryphaeus/coryphaea: HuD jenchu’bogh Daq Dabbogh Qun; Qunvam Del coryphaea, ‘ej artemis pong cha’DIch ‘oH. coryphaeon HuDDaq artemis coryphaea chIrgh tu’lu’pu’. (epidaurusDaq Sum coryphaeon HuD). ‘ach Dunchu’bogh Qun DelmeH vay’, coryphaeus lo’laH je, vaj zeus pong cha’DIch ‘oH je coryphaeus‘e’.

      cosmetes: nuvpu’vaD chut pabmoHbogh vay’, chutmey qonbogh vay’. sparta ‘oH zeus pongvam cha’DIch mung’e’.

      crataebates: yItbogh ‘ej HoSbogh vay’.

      croceatas/krokeatas: laconiaDaq gythium tu’lu’, ‘ej gythiumDaq Sum croceae Daq. Daqvammo’ zeus pongvam cha’DIch qonlu’pu’.

      cronides/cronion/cronius/kronides/kronidis/kronion/kronios: cronus puqloD; zeus pongmey cha’DIch’e’ pongvam potlh law’ pong law’ potlh puS. vav pong (cronus) ‘oH pongvam cha’DIch mung’e’, ‘ej zeus Dellu’meH, roD pongvam cha’DIch lo’lu’.

      ctesius: juH, yer, Hoch’e’ ghajbogh nuv je Qanbogh vay’; mIp nobbogh vay’. phlyusDaq zeus pongvam cha’DIch lo’lu’pu’ je. hermes pong cha’DIch ‘oH je ctesius‘e’.

      dictaeus: crete ‘ambayDaq crete chan yoSDaq dicte HuD tu’lu’, pa’ dictaion DIS tu’lu’, DISvamDaq nenchoHpu’ zeus, ‘ej pa’ nenchoHtaHvIS, Qorghlu’. dicte HuDmo’ zeus pongvam cha’DIch qonlu’pu’. pothereus bIQtIq HeHDaq prasusDaq zeus dictaeus chIrgh tu’lu’pu’.

      dodonaeus: dodonaDaq zeus lulIgh tu’lu’pu’, watlh lulIghvam net Dam, ‘ej ‘De’ ‘otHa’meH zeus, pa’ maqlegh ghogh lo’pu’. lulIghvam ‘oH zeus pongvam cha’DIch mung’e’.

      dolichaeus/dolichenus: dolichene Surya’ vengmo’ pongvam cha’DIch qonlu’pu’. qaStaHvIS vatlh DIS poH cha’DIch vatlh DIS poH wejDIch je (bovvam), roma’ wo’Daq noychoHtaH zeus dolichaeus/dolichenus lalDan.

      eleusinios: eleusis zeus. ioniaDaq zeus quvmoHlu’taHvIS, pongvam cha’DIch lo’lu’ je.

      eleuthereus/eleutherius: toDbogh vay’, tlhabchoHmoHbogh vay’.

      endendros: SormeyDaq ghaHtaHbogh vay”e’. boeotiaDaq zeus pongvam cha’DIch lo’lu’pu’ je. pIj zeus chIrghmey Dechpu’ Sormey/naHlet Sor law’, vaj chaq ngoDvammo’ pongvam cha’DIch qonlu’pu’.

      ephaptor: HotDI’ ghaH, boghmoH; io Hotpu’mo’ zeus, yatlhchoHpu’ io, vaj tagha’ epaphos boghmoHpu’ zeus.

      epidotes: nuvvaD Doch/yer vey’ nobbogh vay’. varHa’ zeus ‘e’ chIw epidotes. mantineaDaq pongvam cha’DIch lo’lu’pu’ je.

      epiphanes: bochbogh ‘ej wovbogh vay’. latlhpu’vaD ‘ang’eghbogh vay’. vay’ luleghlaH latlh latlhpu’vamvaD ‘e’ qaSmoHbogh vay’.

      epirnutius: crete ‘ambayDaq ‘op zeus pong cha’DIch lulo’lu’pu’, ‘ej epirnutius ‘oHpu’ wa”e’.

      epistius: qerjIqmey rangbogh vay’. mebpu’vaD/SuchwI’pu’vaD jupna’ Da juH ghajwI’, DochHa’, ‘ej chaHvaD Hoch ghajnISbogh nob; wanI’meyvam rangbogh vay’.

      eribremetes: tuDbogh vay’, ‘ej tuDtaHvIS, wab vItlh QoymoH.

      erigdupus: tuDbogh vay’.

      eros: rut orpheus ghItlhmeyDaq eros ‘oH wa’ zeus pong cha’DIch’e’.

      erros: zeus ghaH erros‘e’.

      eucleius: noybogh vay’, ‘ej QaQ vay’vam bopbogh latlhpu’ vuD’e’. vay’ vuvlu’bogh. ngay’ ghajbogh vay’.

      europaeus: nom vogh europa qengpu’ zeus; wanI’vammo’ zeus pongvam cha’DIch qonlu’pu’.

      euryopa: mInDu’ vaS vay’.

      evanemus/euanemos: QaHbogh SuS nobbogh vay’. spartaDaq zeus lulIgh quvmoHlu’bogh tu’lu’pu’, ‘ej pa’ zeusvaD zeus evanemus/euanemos ponglu’pu’.

      exakesterius: mIghwI’ nupmoHbogh vay’.

      gamelii/gamelioi theoi: {Qunpu’} ‘oH <theoi mu’e’> ‘ej tlhogh luQanbogh ‘ej lurangbogh Qun’e’ Del pongvam cha’DIch. chaH Qan vagh Qun (zeus hera aphrodite peitho artemis je) ‘e’ lutlhob tlhoghchuqbogh nuv; ngoDvam ‘otHa’ plutarch. ‘ach gamelii chaHbogh latlh Qun’e’ tu’lu’ je. moeraevaD Qunpu’ gameliai ponglu’ je, ‘ej chaq HochHom Qunpu’vaD tlhogh QanwI’pu’ DamlaH vay’. vaj chaq Qunpu’vaD Delbogh plutarch tlhogh QanwI’pu’ Damqu’laH vay’. Qunpu’vammo’ gamelion jar pong luqonpu’ athenians.

      gamelius: tlhoghmey rangbogh zeus‘e’. qaStaHvIS jar gamelion jaj wa’DIch, qaS tlhoghmeyvam, ‘ej tlhoghmeyvamvaD tlhogh Do’ luDamlu’.

      genetaeus/genetaios: euxineDaq genetus puHley’ tu’lu’, ‘ej puHley’vam pongmo’ zeus pongvam cha’DIch qonlu’pu’. pa’ zeus quvmoHlu’taHvIS, ghaHvaD euxeinos Damlu’, ‘ej {mebpu’vaD/SuchwI’pu’vaD jupna’ Dabogh vay’} Del euxeinos. euxineDaq genetus puHley’Daq zeus lulIgh quvmoHlu’bogh tu’lu’pu’.

      genethlius: qorDu’ ’emrIgh. qorDu’ vav.

      hagnos: watlhbogh vay’, nItbogh vay’, vay’ quvmoHlu’chu’bogh.

      hecaleius: zeus pong cha’DIch ‘oH hecaleius‘e’, ‘ej wa’ be’ qan pong –hekale– ‘oH pongvam cha’DIch mung’e’. kris tavros (creta tangqa’) jonmeH theseus, vangchoHpu’, vaj ve’choHpu’. ve’taHvIS theseus, lulIgh SamnISpu’; ngugh theseusvaD jupna’ Dapu’ wa’ be’ qan (hekale ghaH be’vam’e’), ghaHvaD lulIgh nobpu’, ‘ej ghaHvaD QaQpu’ ‘ej DochHa’pu’. ghIq lay’pu’ be’vam: > Qu’vam turchugh theseus, zeusvaD jI’anmoH. < tagha’ Qappu’ theseus, ‘ach cheghpu’DI’, wejHa’ Heghpu’ be’. Hoch wanI’meyvam Sovpu’mo’ Daqmey Sum nuvpu’, be’vam luquvmoHmeH, yupma’ lucherpu’, yupma’vamvaD hekalesia lupongpu’, ‘ej qaStaHvIS yupma’vam, zeus hecaleiusvaD ‘anmoHpu’. be’vam pongmo’ zeus pongvam cha’DIch luqonlu’pu’.

      hecatombaeus: hecatombs Hevbogh vay”e’. wa’vatlh oxen nob ‘oH hecatomb‘e’.

      hellanian: ‘elaDya’ zeus.

      hellenius: ‘elaDya’nganpu’ zeus.

      herceus: ‘op juHDaq -tlhopDaq- beb Hutlhbogh Daq tu’lu’; Daqvam zeus. zeusvaD juH qorDu’ Qun Damlu’, pongvam cha’DIch lo’lu’taHvIS.

      hermonthites: maSIrDaq hermonthisDaq zeus pongvam cha’DIch lo’lu’pu’ je.

      hetaereius/hetaireios: malja’mey, juppu’ ghommey je QanwI’. taghpu’pa’ argonauts Hoq, ghompu’ argonauts, ‘ej zeus hetaereiusvaD/hetaireiosvaD ‘anmoHpu’, latlh Qunpu’vaD ‘anchoHmoHpu’pa’ je net Har.

      hicesius: Qunpu’ tlhobbogh nuvpu’ Qun.

      homagyrius: tlhop ghommey, DIvI’mey je rangbogh vay’. ‘ev peloponnesus HeHDaq aegiumDaq zeus pongvam cha’DIch lo’lu’pu’ je. troy noH DuH lurIchmeH agamemnon, ‘elaDya’ che’wI’pu’ je, pa’ ‘elaDya’ che’wI’pu’ ghommoHpu’ agamemnon. zeus pongvam cha’DIch lo’lu’taHvIS, zeusvaD achaea DIvI’ QanwI’ Damlu’pu’ je.

      horcius/horkios: ‘Ipmey rangbogh vay’; ‘IptaHvIS nuv, Qun’e’ rItbogh nuvvam; ‘Ip pabHa’wI’pu’ bIjbogh vay’. ‘op Qun lurItlu’taHvIS, rut pongvam cha’DIch lo’lu’, ‘ach zeus rItlu’taHvIS, motlh pongvam cha’DIch lo’lu’. olympiaDaq zeus horcius/horkios Hew tu’lu’pu’.

      horius: veHmey, Daqmey noy, qachmey noy je ‘avwI’.

      hyes/hyetius: loQ yIQbogh Qun. pIrchoHmoHbogh Qun. SISchoHmoHmo’ zeus, zeus pongvam cha’DIch lo’lu’. argosDaq zeus hyetius ‘anmoHmeH qachHom tu’lu’pu’. trophoniusDaq (lebadeiaDaq Sum trophonius) wa’ Daq le’ tu’lu’, ‘ej pa’ naH/naHlet Sor lupochlu’pu’. DaqvamvaD Daq watlh Damlu’, ‘ej pa’ zeus hyetius Hew tu’lu’pu’. dionysus pong cha’DIch ‘oH je hyes‘e’, ‘ej phrygia sabazius Qun pong cha’DIch ‘oHqu’ je. rap sabazius dionysus je rut net Dam, ‘ej rap sabazius zeus je rut net Dam je.

      hymettius: atticaDaq ymittos HuD tu’lu’, ‘ej zeus pongvam cha’DIch mung ‘oH HuDvam pong’e’.

      hypatus: Dung Qunpu’. (Dung Qunpu’ tu’lu’, ‘ej Qunpu’ Dop (chthonic Qunpu’) tu’lu’ je. Qun le’ Del pongvam cha’DIch; Qunvam nIv law’ Hoch nIv puS, Qunvam Dun law’ Hoch Dun puS. ghuQmeyDaq zeus pongvam cha’DIch tu’lu’, ‘ach zeus quvmoHlu’taHvIS, pongvam cha’DIch lo’lu’ je. athensDaq erechtheium tlhopDaq zeus hypatus ‘anmoHmeH qachHom tu’lu’pu’. pa’ zeusvaD yInbogh vay’ noblu’ net chaw’be’, ‘ej pa’ zeusvaD lIchlu’ net chaw’be’ je; pa’ zeusvaD chab neH lunoblu’. spartaDaq zeus hypatus quvmoHlu’pu’ je, ‘ej boeotia DaqDaq zeus hypatus quvmoHlu’pu’ je. glisasDaq Sum Daqvam.

      hyperpheretes: nIvchu’bogh patlh ghajbogh Qun.

      hypsimedon: Daq jenDaq ghaHtaHbogh vay”e’, ‘ej pa’ ghaHtaHvIS, che’.

      hypsistus: nIvchu’bogh patlh ghajbogh Qun.

      hystatus: Qavbogh vay’.

      icesius: Qunpu’ tlhobbogh nuvpu’ Qanbogh vay’.

      icmaeus: SISchoHmoHbogh Qun.

      idaeus: ida HuDDaq zeus idaeus quvmoHlu’pu’.

      ithomatas/ithometas: thessaliaDaq messeneDaq ghap ithome veng tu’lu’, ‘ej zeus pongvam cha’DIch mung ‘oH vengvam pong’e’. puq ghaHtaHvIS zeus‘e’, ithomeDaq zeus luQorgh ithome neda je nymphs net Har. ithome nymphmo’ ithome vengvaD ithome pong noblu’pu’, ‘ej neda nymphmo’ neda bIQtIqvaD neda pong noblu’pu’. zeus ithomatas/ithometas quvmoHlu’meH, ithomaea yupma’/pIqcho’ Qujmey lucherlu’pu’. ithome messene HuDDaq zeus lulIgh quv tu’lu’pu’.

      labrandeus: pongvam cha’DIch luQIjbogh cha’ nger tu’lu’. nger wa’: karia Hol labrys mu’ tu’lu’, ‘ej cha’ ghIt ‘obmaQ ‘oH labrys‘e’. ‘obmaQvam pongmo’ zeus pongvam cha’DIch qonlu’pu’. kariaDaq zeus ghopDaq Sarvam ‘obmaQ lanlu’pu’. nger cha’: zeus stratius pong cha’DIch ‘oH labrandeus‘e’. labrandaDaq zeus stratius chIrgh tu’lu’pu’, ‘ej labrandamo’ zeus pongvam cha’DIch qonlu’pu’.

      laoites: nuvpu’ zeus.

      lapersius: lapersae SepHommo’ zeus pongvam cha’DIch qonlu’pu’.

      laphystius/laphustios: boeotiaDaq laphystius HuD tu’lu’, ‘ej HuDvammo’ pongvam cha’DIch qonlu’pu’. ‘ach latlh nger tu’lu’ je; laphussein wotmo’ pongvam cha’DIch qonlu’pu’. tlhoS rap “laphussein” {Haw’} je, vaj Doch rap luDel laphustios phuxios je. DuH wejDIch tu’lu’ je; qaStaHvIS bov ‘eq, ghaHvaD Human lu’anmoHlu’mo’, {ghungtaHwI’}/{yonlaHbe’taHwI’} Del pongvam cha’DIch.

      larisaeus: asia minorDaq cayster bIQtIqDaq larissa veng tu’lu’pu’, pa’ zeus chIrgh tu’lu’pu’, vaj pongvam cha’DIch qonlu’pu’.

      larissaeus/larissaios: argosDaq larissa ra’bogh jem’IH tu’lu’pu’. jem’IHvam pongmo’ zeus pongvam cha’DIch qonlu’pu’. apollo pong cha’DIch ‘oH je larissaeus‘e’/larissaios‘e’, ‘ej rap zeus apollo je pongvam cha’DIch mung.

      latialis/latiaris/latius: latiumDaq zeus quvmoHlu’pu’mo’, pongvam cha’DIch qonlu’pu’.

      lecheates: boghmoHtaHvIS be’, be’vam Qan pongvam cha’DIch zeus. athena vav ghaH zeus‘e’, ‘ej zeus DI’onvammo’ alipheraDaq zeus lecheates quvmoHlu’pu’.

      leuceus: bochbogh vay’, Dembogh vay’, chISbogh vay’. elisDaq lepriumDaq pongvam cha’DIch lo’lu’pu’.

      limenoscopus/limenia/limenites/limenitis: vergh Qanbogh vay’, vergh loHbogh vay’. pongvam cha’DIch lughaj ‘op Qun: zeus, artemis, aphrodite, priapus, pan, latlhpu’ je.

      lycaeus/lukaios: rut pongvam cha’DIch lyceus Sar tu’lu’ je. arcadiaDaq lycaeum HuDDaq ‘op Qun luquvmoHlu’pu’, ‘ej pa’ zeus quvmoHlu’pu’ je. HuDvamDaq zeus lulIgh quv tu’lu’pu’, ‘ej pa’ lycaea yupma’ loplu’pu’. chIrghvam ‘el vay’ net chaw’be’, ‘ej pe’vIl pa’ ‘elpu’chugh vay’, qaStaHvIS wa’ DIS, chIrghvam ‘elHa’laHbe’taH nuvvam ‘e’ luHar ‘op, ‘ej QIb ghajbe’choH nuvvam ‘e’ luHar ‘opvam je. ‘a jaS Har latlhpu’: chIrghvam ‘elpu’bogh vay’ lumuHmeH arcadians, ghaHDaq naghmey lu’vo’, pagh ghaHvaD stag pongchoHlu’, ‘ej toD’eghmeH nuvvam, Haw’nIS. Hochvam luHar latlhpu’vam. lycaeon HuDDaq boghpu’mo’ pan, ‘ej pa’ wa’ lulIghDaj quv tu’lu’pu’mo’, lycaean pong cha’DIch ghaj je pan. apollo pong cha’DIch ‘oH je lycaeus‘e’.

      maemactes/maimaktes: ngIjbogh vay’, jevbogh vay’. chaq maemacterium ‘elaDya’ jar pong ‘oH pongvam cha’DIch mung’e’, chaq pongvam cha’DIch ‘oH attica jar maemacterion mung’e’. ‘a latlh nger tu’lu’ je; ‘elaDya’ mu’ maemactes ‘oH pongvam cha’DIch mung’e’. rap <maemactes> {QeH} wot je. athensDaq zeus quvmoHlu’taHvIS, pongvam cha’DIch lo’lu’pu’ je, ‘ej zeus quvmoHlu’taHvIS, pongvam cha’DIch lo’lu’chugh, ghaHvaD rewve’ Qun Damlu’. vaj jevbe’meH, ‘ej qaSbe’meH qImroqmey qab, ngugh zeus rItlu’. qaStaHvIS maemacterion jar, athensDaq maemacteria luloplu’.

      mechaneus: ‘oghbogh vay’, vItlhbogh ‘oghmeH laH ghajbogh vay’, jallaHbogh vay’. wa’ mu’ ‘oH pongvam cha’DIch mung’e’, ‘ej rap mu’vam {Ho’DoS} {SommI’} je. zeusvaD jInmolmey/Qu’mey/ngoQmey Qatlh turchoHbogh nuvpu’ QanwI’ le’ Damlu’mo’ je, pongvam cha’DIch qonlu’pu’. argosDaq zeus pongvam cha’DIch lo’lu’pu’ je. ‘ach pongvam cha’DIch latlh Sar tu’lu’ je, ‘ej be’ chaHbogh Qun’e’ luDellu’meH, Sarvam lo’lu’; mechanitis ‘oH pongvam cha’DIch’e’. megalopolisDaq aphrodite quvmoHlu’taHvIS, pongvam cha’DIch lo’lu’pu’ je, ‘ej athena pong cha’DIch ‘oH je mechanitis‘e’.

      meilichius/meilichios/milichius: DochHa’bogh nobbogh ‘ej varHa’bogh Qun; Qun jotchoHmoHbogh Qaghpu’bogh vay’, ‘ej Qaghpu’bogh vay’vaD jup mojqa’laHbogh Qun. ‘op Qun pong chaDIch ‘oH meilichius/meilichios‘e’: 1. zeus pong cha’DIch ‘oH. Qaghpu’chugh nuv, vaj zeus jotchoHmoHmeH, ‘ej zeusvaD jupDaj mojqa’moHmeH, zeus quvmoH neHchugh, ‘ej zeusvaD ‘anmoHchugh, nuvvam Qan zeus. Hoch DIS athensDaq zeusvaD cakes lunoblu’pu’, qaStaHvIS diasia yupma’. cephissusDaq sicyonDaq argosDaq je zeus meilichius/meilichios ‘anmoHmeH qachHom luchenmoHlu’pu’. 2. naxos ‘ambayDaq dionysus pong cha’DIch ‘oH je meilichius/meilichios‘e’. 3. tyche pong cha’DIch ‘oH je meilichius/meilichios‘e’.

      melissaeus: bees bopbogh vay’. puq ghaHtaHvIS zeus‘e’, luQorgh amaltheia, latlh nymphs je. be’nI’ chaH amaltheia‘e’ melissa‘e’ je, ‘ej melissa ‘oH zeus pongvam cha’DIch mung’e’.

      messa: botlh.

      messapeus/messapeos: laconiaDaq taygetus HuD jaHmeH vay’, wa’ taw lo’. puH beQDaq tawvam tu’lu’, ‘ej puHvam beQ wa’ yoSDaq zeus pongvam cha’DIch lo’lu’pu’ je. zeus toy’pu’bogh wa’ maqlegh pong ‘oH pongvam cha’DIch mung’e’.

      metieta: qeSbogh vay’, Hoch Sovbogh vay’.

      metis: rut orpheus ghItlhmeyDaq zeus pongvam cha’DIch lo’lu’ je.

      moiragetes: San SeHbogh vay’. delphiDaq zeus apollo je pong cha’DIch ‘oHpu’ je moiragetes‘e’.

      morius: olive Sor Qanbogh vay’. athena Sor quv ‘oH olive Sor’e’

      nemeius/nemeios: argosDaq zeus nemeius/nemeios lulIgh quv tu’lu’pu’, pa’ jey’ Sorpuq HewDaj’e’ chenmoHpu’bogh lysippus tu’lu’pu’, ‘ej zeus quvmoHlu’meH, pa’ qaSpu’ Qujmey.

      nemetor: noDwI’; ruv qaSmoHbogh vay’.

      nephelegereta: ‘engmey yIrbogh vay’.

      nicaeus: yay chavbogh zeus.

      nicephorus: yay qengbogh vay’.

      nomius: peSbogh vay’. varHa’wI’. motlh Hatlh/Satlh bopbogh nuvpu”e’/Dochmey’e’/Sojmey’e’ luDellu’meH, <nomius> mu’ lo’lu’, ‘a naDev <nomius> QIj <nemo> wot; rap <nemo> {peS} wot je.

      nomos: Qunpu’ nuvpu’ je che’wI’ ghaHmo’ zeus‘e’, pongvam cha’DIch lo’lu’taHvIS, zeusvaD chut ‘oSbogh vay”e’ Damlu’.

      ogoa: mysalaDaq zeus caria pong cha’DIch ‘oHpu’ ogoa‘e’. rut pa’, zeus chIrgh qoDDaq, bIQ’a’ yu’egh leghlu’pu’. mysala Qun pongmeH strabo, caria Hol Sar osogo pong lo’.

      olympius/olympios: olympiaDaq zeus pongvam cha’DIch lo’lu’pu’ je, ‘ej pIj pongvam cha’DIch neH lo’lu’pu’ (<zeus> noplu’pu’), zeusvaD jatlhlu’taHvIS. ‘ach latlhpu’ pong cha’DIch ‘oH je olympius‘e’/olympios‘e’; olympus luDabbogh Qunpu’, muses, heracles je pong cha’DIch ‘oH je.

      ombrimothymus: Sub ghaHbogh vay”e’ ‘ej not bupbogh vay’; vay’ ghIjlu’be’bogh. not vay’ charghlu’bogh.

      ombrius/ombrios: SISmoHbogh vay’. atticaDaq hymettus HuDDaq zeus ombrius/ombrios ‘anmoHmeH qachHom tu’lu’pu’.

      paeon: Qel; vorwI’; toDwI’; tlhabchoHmoHwI’. rhodes ‘ambayDaq pongvam cha’DIch lo’lu’pu’ je.

      palamnaeus: chotwI’pu’ bIjbogh vay’.

      panamaros: cariaDaq pongvam cha’DIch lo’lu’pu’ je. pa’ panamarea (yupma’Daj) loplu’pu’.

      pancrates: HoSghajchu’bogh vay’.

      panhellenius/panellenios: Hoch ‘elaDya’nganpu’ Qun, Qun’e’ luquvmoHbogh Hoch ‘elaDya’nganpu’. dodona zeus pong cha’DIch ‘oH pongvam cha’DIch’e’, ‘ej thessalyvo’ aegina ‘ambay lujaHpu’DI’ ‘op hellenes, pa’ dodona zeus lalDanHom luqeng je. ghIq Hoch ‘elaDya’nganpu’ pong mojpu’DI’ hellenes pong, Hoch ‘elaDya’nganpu’ bopchoHpu’ pongvam cha’DIch. poH Qatlh tu’lu’pu’, ‘ej Qatlhpu’, ghungchu’taHmo’ Hoch, ‘ach Soj tu’lu’be’taH; ngugh ghu’vam qay’ ngabmoHmeH aeacus, zeusvaD ‘elaDya’nganpu’vaD je juppu’ mojnISmoH, vaj zeusvaD ‘annISmoHpu’. Hochvam SovmoHpu’ delphi Qun chabal ‘otHa’wI’. Qu’vam turchu’meH aeacus, zeusvaD ‘anmoHpu’, ‘ej vay’vamvaD ‘anmoHpu’bogh aeacus Hoch ‘elaDya’nganpu’ nob Dampu’ aeacus. ngugh maqpu’: Hoch ‘elaDya’nganpu’ Sep Qun ghaH zeus‘e’. aeginaDaq zeus panhellenius lalDan lulIgh quv tu’lu’pu’, lulIghvam chenmoHpu’ aeacus net Har, ‘ej pa’ panhellenia yupma’ loplu’pu’. zeus panhelleniusvaD Hoch ‘elaDya’nganpu’ QanwI’ Damlu’ je.

      panomphaeus: tuch lu’otHa’bogh Hoch mu’mey mung ghaHbogh vay”e’. tera’vamDaq tuch lu’otHa’bogh Hoch ghoghmey mung ghaH zeus‘e’ ‘e’ chIw pongvam cha’DIch. zeusmo’ laHDaj luHev Hoch tuch rItwI’pu’ ‘e’ chIw je pongvam cha’DIch.

      panoptes: Hoch leghbogh vay’.

      pantogenethlos: Hoch lIngbogh vay’; Hoch vav.

      pantotinactes: Hoch tavbogh vay’.

      papaeus: Hoch vav; pongvam cha’DIch QIjlu’meH, QIjlaw’ghachvam chuplu’pu’. zeus luquvmoHlu’taHvIS scythianganpu’, pongvam cha’DIch lulo’ je.

      parnethius/parnethios: atticaDaq parnes HuD tu’lu’, ‘ej HuDvammo’ pongvam cha’DIch qonlu’pu’. parnes HuDDaq zeus jey’ Sorpuq Hew tu’lu’pu’.

      pasianax: Hoch voDleH.

      pater: vav.

      patrous/patroa/patroios/patroia: pa’logh wa’ Qun luquvmoHchugh qempa’pu’/’emrIghpu’, ‘ej DaH Qunvam luquvmoHchugh je Sep Hoch, qorDu’ joq, patrous/patroa/patroios/patroia ‘oH je Qunvam pong cha’DIch’e’. rut QunvamvaD nuvpu’ mung Damlu’. vaj athensDaq zeus quvmoHlu’taHvIS, patrous/patroios pong cha’DIch lo’lu’ je. mungchaj ghaH zeus‘e’ ‘e’ luHar heracleidae, ‘ej luHarmo’, zeusvaD Qun patrous/patroios Damlu’.

      pelasgicus: pelasgiangan. dodona Qun cha’bal ‘otHa’wI’ lucherpu’ pelasgiangan ‘e’ luHarmo’ ‘op, pa’ –dodonaDaq- pongvam cha’DIch lo’lu’ je.

      phanaeus: tamghay nobwI’, tamghay qemwI’.

      philius: juppu’ QanwI’.

      phytalius: Soj nobbogh vay’.

      phytalmius: Soj nobbogh vay’.

      phyxius/phuzios: narghmeH nuvpu’, Haw’; nuvpu’vam Qanbogh Qun. pa’logh thessalyDaq zeus pongvam cha’DIch lo’lu’ je. wa’ apollo pong cha’DIch ‘oH je.

      pisaeus: pa’logh elisDaq pisaDaq zeus pongvam cha’DIch lo’lu’ je.

      pistius: vIt bopbogh Qun. HarmeH laH Qun.

      plusius: yer law’qu’ ghajbogh vay’, mIpbogh vay’. mIp nobbogh vay’. spartaDaq zeus pongvam cha’DIch lo’lu’pu’ je.

      plutodotes: mIp nobbogh vay’.

      polieus: veng QanwI’. athens acropolisDaq zeus polieus ‘anmoHmeH qachHom tu’lu’pu’, qachHomDaq wheat barley je luvo’lu’pu’, bIH Soppu’ tangqa’, ‘ej ghIq zeusvaD tangqa’vam ‘anmoHta’ maqlegh. tangqa’ HoHpu’DI’ maqlegh, ‘obmaQ lo’pu’bogh polHa’ maqlegh, ghIq bo’DIjDaq ‘obmaQ qemlu’pu’, ‘ej pa’ mIwba’ SIQnISpu’ ‘obmaQ. qaStaHvIS diipoleia yupma’, zeus polieus quvmoHlu’.

      poliuchus: zeus, veng QanwI’. qaStaHvIS diipoleia yupma’, zeus poliuchus quvmoHlu’.

      polytimetus: wa’ quvqu’moHlu’bogh.

      propator: cherpu’bogh Qun wa’DIch, vav wa’DIch, vavnI’.

      prostropaeus: lam’a’ ‘ombogh vay’.

      protus: wa’DIch.

      pyrphorus: qul qemwI’. pe’bIl joH.

      sabazius: zeus phrygia pong cha’DIch. dionysus pong ‘oH sabazius‘e’, ‘ach orpheus bom loSmaH chorghDaq zeus ghaH sabazius‘e’. mu’tlhegh yamtaw wa’Daq ghaHvaD kronos puqloD ponglu’, ‘ej yamtaw mu’tlhegh cha’Daq yamtaw mu’tlhegh wejDaq je sabazius bopbogh De’ ‘otHa’lu’taHvIS, SovmoHlu’: >’uS nev’obDajDaq dionysus lanpu’ sabazius, ‘ej ghIq nev’obDaj QISpu’ sabazius.< vaj bomvamDaq zeus ghaH sabazius’e’; Qun pIm ghaHlaHbe’.

      sceptuchus: voDleH naQ ‘uchbogh vay’.

      scotitas: Hurghbogh vay’, tlhoDbogh vay’.

      seisichthon: tera’ QommoHbogh vay’.

      semaleus: ‘otHa’bogh vay’ nobwI’.

      sosepolis: veng toDwI’.

      soter: toDwI’, tlhabmoHwI’. vanpu’DI’ leng, ‘ej qaStaHvIS lengvam, nuv luQanlu’taH, zeus sotervaD ‘anmoH nuvpu’. pIj bIQ’a’ verghmeyDaq zeus soter chIrghmey tu’lu’pu’ (Sarvam chIrgh ‘oH piraeus zeus chIrgh’e’). HIvje’ wejDIch winevaD zeus soter wine Damlu’, ‘ej winevam tlhutlhchugh vay’, Do’choH net Har, vaj tagha’ {wejDIch}vaD {-DIch} Do’ DamchoHlu’pu’; zeusvaD toDwI’ wejDIch ponglu’ je. argosDaq troezeneDaq laconiaDaq messeneDaq mantineiaDaq megalopolisDaq je zeus pongvam cha’DIch lolu’pu’ je, ‘ej zeus sotervaD HochvaD lu’anmoHlu’bogh soteria luponglu’. ‘ach latlh Qunpu’ pong cha’DIch ‘oH je soter‘e’; helios bacchus je pong cha’DIch ‘oH je.

      steropegeretes: rawbogh vay’, pe’bIl vI’moHbogh vay’.

      sthenius/sthenios: HoSghajwI’, HoSchoHmoHwI’, Dunqu’wI’. hermioneDaq Sumpu’ zeus sthenius ‘anmoHmeH qachHom; nagh qoDDaq ‘anmoHmeH qachvam chenmoHlu’pu’. pa’ yanDaj waqmeyDaj je So’pu’ aegeus, ‘ej yanvam waqmeyvam je’ Sampu’ theseus, naghvam peppu’DI’.

      stratius/stratios: noH bopbogh vay’, mangghommey bopbogh vay’. zeus pong cha’DIch ‘oH pongvam cha’DIch’e’, ‘ach ares pong cha’DIch ‘oH je.

      synestius: qerjIq ‘avwI’.

      teleius: povbogh vay’, HoSghajchu’bogh vay’.

      telesiurgus: povchoHmoHwI’, naQchoHmoHwI’.

      temenites: SepDaq ‘op Daq le’ tu’lu’; Daqvam luQanlu’, ‘ej QunvaD neH Daqvam lulo’lu’. wa’ Daqvam ponglu’meH, “temenos” mu’ lo’lu’, vaj Daqvam Qun Del temenites. amorgos ‘ambayDaq zeus pongvam cha’DIch lo’lu’pu’ je.

      themistius: ruv ‘avbogh ‘ej Qanbogh vay’.

      theus agathus: Qun QaQ.

      triophthalmus: wej mIn Qun. chalmey puHmey bIQ’a’mey je che’ zeus ‘e’ chIw pongvam cha’DIch. wej mInvaD wej loDnI’ (zeus poseidon plouton je) luDamlu’ ‘e’ chIw je.

      tropaeuchus: ghaHvaD tevmey Suqpu’bogh charghwI’pu’ lunoblu’.

      tropaeus: choHbogh vay’, wanI’mey choHbogh vay’, vaj yay nobbogh vay’.

      trophonius: boeotiaDaq lebadeiaDaq Qun ‘otHa’wI’ tu’lu’pu’, ‘ej ‘otHa’wI’vam bop pongvam cha’DIch. ‘otHa’wI’vam qeS SuqmeH vay’, DIS jaQDaq ghIrpu’. zeus chthonius, Sub ghap ghaH trophohnios‘e’; DuH lugh Sovchu’be’ vay’, ghItlhmey HaDtaHvIS. delphi Qun lulIgh quv chenmoHpu’ vay’; trophohnios ghaH vay’vam’e’ net Dam.

      uranius: chalmey DabwI’.

      xenius/xenios: meb, SuchwI’; vaj mebpu’/SuchwI’pu’ Qanbogh Qun ghaH zeus‘e’. mebpu’vaD/SuchwI’pu’vaD varHa’ juH ghajwI’, ‘ej chaHvaD jup Da; ghu’vam Qun ghaH zeus xenius‘e’, ‘ej juH ghajwI’ DI’onmeyvam chIw. pongvam cha’DIch be’ Sar tu’lu’ je, “xenia“‘oH pongvam cha’DIch be’ Sar’e’, ‘ej wa’ athena pong cha’DIch ‘oH. vaj DI’onmey Delbogh pongvam cha’DIch chIw je athena.

      ypsizygus: Daq jenDaq ‘oHtaH quS’a’Daj’e’; pa’ ba’.

      zas: qo’ mung lut qonpu’ syros ‘ambay pherecydes vIt nejwI’, ‘ej lutDajDaq zeusvaD zas pong. DaHjaj lutvam HochHom SamlaHbe’ vay’, ‘ach wej qo’ bI’reS ghanroq’a’ Del qo’ mung lutvam: zas, chthonie (tera’), chronos (poH) je. zeusvaD dis, zin, din, zis je pong je pherecydes ‘e’ SovmoH herodian. latlh pongmey lo’ je pherecydes ‘e’ SovmoH je herodian.

      zygius/zygia/zugios/zugia: zeus pong cha’DIch ‘oH zygius‘e’/zugios‘e’, ‘ej hera pong cha’DIch ‘oH zygia‘e’/zugia‘e’. tlhogh lurang zeus hera je ‘e’ luDel pongvam cha’DIch.