athena pongmey cha’DIch

      acraea/akraia/acraeus/akraios: HuDmeyDaq bIHtaH ‘op Qun chIrgh’e’, ‘ej acraea/akraia/acraeus/akraios bIH Qunpu’vam pong cha’DIch’e’. be’ ghaHchugh Qun’e’, acraea/akraia ‘oH pongDaj cha’DIch’e’, ‘ej loD ghaHchugh Qun’e’, acraeus/akraios ‘oH pongDaj cha’DIch’e’. zeus hera aphrodite pallas artemis latlhpu’ je chaH Qunvam’e’.

      aeolomorphus: tu’qomDaj choHlaHbogh vay’.

      aethyia/aithuia: megariaDaq athena quvmoHlu’taHvIS, athena pongvam cha’DIch lo’lu’ je. bIQ’a’ qoD ‘elbogh vay”e’ Del aithuia mu’, ‘ej SorHa’lu’chugh, bIQ Duj Del je, vaj bIQ Duj chenmoHmeH mIw’e’ ghojmoHpu’bogh athena boplaw’ pongvam cha’DIch, ‘ej chIjmeH mIw’e’ ghojmoHpu’bogh athena boplaw’ je. ‘ach pongvam cha’DIch mung bopbogh latlh nger tu’lu’ je; gannet mID vay’ Del pongvam cha’DIch.

      ageleia/ageleis: pongvam cha’DIch luQIjbogh wej nger tu’lu’. nger wa’: oxen/kine QanwI’ Del pongvam cha’DIch. nger cha’: {Soch} mI’ wu’ ‘oS ayaeleia mu’, qo’vam chut’a’ mI’ ‘oH Soch’e’, ‘ej qo’vam chut’a’ rangmo’ athena, pongvam cha’DIch lInglu’pu’. ‘ach nger wejDIch tu’lu’ je, ‘ej nuvpu’ Devbogh/Qanbogh vay’ Del pongvam cha’DIch ‘e’ SovmoH ngervam.

      aglaotimus: vay’ quvmoHqu’lu’bogh.

      agoraea/agoraia/agoraeus/agoraios: ngevmeH Daq vay’. veng ngevmeH DaqDaq ghom nuvpu’, ‘op QunvaD ghommeyvam QanwI’ luDamlu’, vaj Hoch QunvamvaD agoraea/agoraia/agoraeus/agoraios ponglu’; be’ ghaHchugh Qun’e’, ghaHvaD agoraea/agoraia pong cha’DIch lo’lu’, ‘ej loD ghaHchugh Qun’e’, ghaHvaD agoraeus/agoraios ponglu’. zeus athena artemis hermes latlhpu’ je chaH Sarvam Qun’e’.

      ajantis: ajax vay’. salamis Sub ghaH ajax‘e’.

      alalcomeneis/alalkomeneis/alalcomene: pongvam cha’DIch lubopbogh ‘op nger tu’lu’. Sub ghaHbogh alalcomenes‘e’ bop pongvam cha’DIch ‘e’ SovmoH wa’ nger, ‘ej boeotia alalcomenae vengHom (pa’ boghpu’ athena net Har) ‘oH pongvam cha’DIch mung’e’ ‘e’ SovmoH latlh nger. ‘ach nger wejDIch tu’lu’ je’; pongvam cha’DIch lIng alalkein wot, vaj {HubwI’}/{HubwI’ HoSghaj} yajmoH pongvam cha’DIch.

      alcis/alkis: HoSbogh vay’. macedoniaDaq athena quvmoHlu’taHvIS, pongvam cha’DIch lo’lu’ je.

      alea: aleaDaq mantineiaDaq tegeaDaq je athena alea quvmoHlu’. tegeaDaq athena alea chIrgh tu’lu’, chIrghvam ngo’ law’ Hoch ngo’ puS, ‘ej aleus (apheidas puqloD) ghaH chIrghvam chenmoHwI”e’ net Dam; vaj ghaytan aleus pongmo’ pongvam cha’DIch qonlu’pu’. tera’ DIS 394 -bov vorgh- chIrghvam meQlu’pu’, ‘ej ghIq chIrgh chu’ chenmoHpu’ scopas. chIrghvam chu’ tIn law’ Hoch peloponnesus chIrghmey tIn puS, chIrghvam Dun law’ Hoch peloponnesus chIrghmey Dun puS, chIrghvam luDech wej tut gho, ‘ej pIm Hoch tutvam Sar. athena Hew chenmoHpu’ endoeus, ‘e’levan Ho’ neH yugh, ‘ej ghIq ‘IHchoHmeH roma’ forum augusti, pa’ Hewvam qengpu’ augustus. tIQbogh lulIgh wembe’lu’bogh ‘ej quvqu’moHlu’bogh ‘oH tegea athena alea chIrgh’e’, Qan’eghmeH ‘ej toD’eghmeH nuv law’, pa’ lujaH, ‘ej nuvvam pong tamey tu’lu’. reH be’Hom ghaH tegea athena alea chIrgh maqlegh’e’, ‘ach jaqtala’ SIQchoHpu’DI’, Qu’vam turbe’choHpu’. sparta therapne je rarbogh tawDaq athena alea Hew tu’lu’ je.

      alector: rooster yajmoH ‘elaDya’ mu’ alector.

      ambulia/amboulia/ambulius/amboulios/ambulii: zeus athena dioscuri je quvmoHtaHvIS spartans, pongmeyvam cha’DIch lo’lu’ je. loD ghaHchugh Qun’e’ luquvmoHbogh, ambulius/amboulios lulo’, be’ ghaHchugh, ambulia/amboulia lulo’, ‘ej Qun law’ chaHbogh Qun’e’ quvmoHbogh, ambulii lulo’. pongvam cha’DIch QIjlaHchu’be’ vay’, ‘ach chaq pongvam cha’DIch lIng anaballo mu’; lughchugh ngervam, Qunpu’vamvaD Hegh lulumbogh Qun’e’ Dam pongvam cha’DIch. ‘ach latlh nger tu’lu’ je. qeS vay’/qeSbogh vay’ Del pongvam cha’DIch ‘e’ SovmoH ngervam.

      anassa: voDleH, joH.

      anemotis: SuSmey vay’, SuSmey vItlhHa’choHmoHbogh vay’. messenia mothoneDaq athena anemotis quvmoHlu’, ‘ej pa’ athena anemotis chIrgh tu’lu’. jevtaHvIS, Sep lurIQchoHmoHmo’ SuSmey vItlh, QaH athena ‘e’ tlhob diomedes, ‘ej ghIq mevpu’ SuSmeyvam. wanI’vammo’ athena anemotis chIrgh chenmoHpu’ diomedes net Har.

      antrodiaetus: DIS Dabbogh vay’.

      apaturia/apatouria/apatouros: tojbogh vay’. athena pongvam cha’DIch qonpu’ aethra.

      areia: vIDbogh vay’, noH bopbogh vay’, noH DI’onmey chIwbogh vay’, Suvrupbogh vay’. athensDaq pongvam cha’DIch athena quvmoHlu’ je. athensDaq ares chIrghDaq ares aphrodite enyo je Hewmey tu’lu’, ‘ej pa’ athena Hew tu’lu’ je. SoSDaj chotpu’ orestes; orestes pumlu’mo’, mIwba’ SIQpu’, ‘ach chun orestes ‘e’ wuq areopagus. ghIq athensDaq athena areia lalDanHom taghmoHpu’ orestes. wuqnIStaHvIS areopagus loHwI’pu’, ‘ach lappu’DI’ Hoch, rapchugh Hoch vuD Dop mIvwa’mey, ghIq lap athena areia. vaj chaq ares ‘oHbe’ pongvam cha’DIch mung’e’, ‘ej chaq ara/areo/aresko bIH pongvam cha’DIch mung’e’. DIp ‘oH ara’e’, ‘ej QunvaD SoQ jatlhbogh vay’ -Qun tlhobtaHvIS- yajmoH mu’vam. wot ‘oH areo‘e’/aresko‘e’, ‘ej >Qun chut vIpabHa’pu’, vaj Qunpu’ vIQeHHa’choHmoHmeH, jIvang;< wanI’vam luDel ‘elaDya’ Hol mu’vam.

      arretus: athena DeltaHvIS athena orpheus bom, arretus pong cha’DIch lo’ je. vay”e’ luDellaHbe’bogh mu’ yajmoH pongvam cha’DIch.

      asia: asia (asia QIv) vay’. colchisDaq athena quvmoHlu’taHvIS, pongvam cha’DIch lo’lu’ je. pa’vo’ laconiaDaq lalDanHomDaj luqempu’ castor polydeuces je net Har, ‘ej laconiaDaq lasDaq athena asia chIrgh chenmoHlu’pu’.

      assesia: ionia assesus vengmo’ athena pongvam cha’DIch qonlu’pu’. pa’ athena assesia chIrgh tu’lu’.

      axiopeonos/axiopoinos: noDwI’. spartaDaq pongvam cha’DIch athena chIrgh chenmoHpu’ heracles, hippocoon puqloDpu’Daj je bIjqu’pu’DI’ heracles, oeonus luchotpu’mo’.

      basileia: voDleH.

      bulaea: rIp vay’. athena quvmoHlu’meH, rIp pa’Daq athena Hew tu’lu’.

      celeuthia: taw vay’.

      chalcioecus/chalkioikos: Sorpuq rom’on je juH Qun. spartaDaq Sorpuq rom’on je yughbogh athena chIrgh tu’lu’, chIrghvamDaq baSmeyvam athena Hew tu’lu’, vaj chIrghvammo’ athena pongvam cha’DIch qonlu’pu’, ‘ej spartaDaq athena quvmoHlu’taHvIS, pongvam cha’DIch lo’lu’ je. qaStaHvIS je pausanias poH, taH chIrghvam. chIrghvam chenchoHmoHpu’ tyndareus ngugh net Har, ‘ach qaSpu’pa’ latlh DIS law’, wej chIrghvam naQchoHmoHlu’pu’, ‘ej tagha’ chIrghvam naQchoHmoHpu’ wa’ spartan meHghem chenmoHwI’. gitiadas ‘oH pongDaj’e’.

      chalinitis: Sarghmey tlhay’choHmoHmeH vay’, SeHmeH tlheghmey lo’; vay’vam Del pongvam cha’DIch. SarghmeyDaq SeHmeH tlheghmey lanbogh vay’ Del je. corinthDaq pongvam cha’DIch athena chIrgh tu’lu’. pegasus tlhay’choHmoHta’ athena, ‘ej ghIq bellerophontesvaD pegasus nobpu’. lutvam qellu’chugh, pongvam cha’DIch yajlu’, ‘ach vabDot lutvam qelbe’lu’chugh, pongvam cha’DIch luQIj athena DI’onmey; yap.

      cissaea: tInchoHtaHbogh ‘arDeH vay’.

      cleiduchus: ngaQHa’moHwI’mey ‘uchbogh vay’. ‘avbogh Qun.

      colocasia: ‘oQqarmey’e’ SoplaHbogh vay’ bop pongvam cha’DIch.

      core: be’Hom, wej tlhoghpu’bogh be’.

      coria: be’Hom, wej tlhoghpu’bogh be’.

      coryphagenes: nachvo’ boghpu’bogh vay’.

      coryphasia/koruphasia: coryphasion puHley’mo’ pongvam cha’DIch qonlu’pu’. pa’ athena lulIgh quv tu’lu’. nach vay’ bop je pongvam cha’DIch.

      cranais: cornel Sor vay’.

      cydonia/kudonia: crete cydonia vay’. elisDaq phrixaDaq athena cydonia chIrgh tu’lu’, ‘ej chIrghvam chenmoHpu’ cydonia clymenus net Har.

      cydre: ngay’ vay’. Dunqu’bogh vay’. chuQun DI’onmey ‘aghbogh vay’.

      cyparissia: messenia cyparissiae vay’. cypress Sor lupochlu’pu’bogh vay’.

      dia: chal’a’ vay’.

      diactorus: toy’bogh vay’, tlhejbogh ‘ej Qorghbogh vay’, QIn qengbogh ‘ej qembogh vay’.

      dracaena: be’ ghaHbogh dragon‘e’.

      ergane: vumbogh vay’. Hoch Sar meHghem rang ‘ej ghojmoH athena net Har.

      eryma: HubwI’.

      euresitechnus: meHghem ‘oghpu’bogh vay’.

      gigantoletira/gigantoleteira/gigantoletis: giants Qaw’wI’.

      glaucopis: lIr mInDu’ vay’, bochbogh mInDu’ vay’. lIr Del ‘elaDya’ glafs mu’, ‘ej tInmo’ lIr mInDu’, ‘ej maS lururmo’, wa’ maS pong ‘oH glafkoh‘e’. SuD ‘ej Hurgh olives bIQ’a’ je, ‘ej qIj je ‘ej wov je; rItlhvam Del glafkos, ‘ej rItlhvam lururmo’ athena mIn, pongvam cha’DIch qonlu’pu’. rarchuq athena lIr (botlh chalDaq leng lIr) je, ‘ej rarchuq je athena bIQ’a’ (qul-aether) je; Hochvam chIw je pongvam cha’DIch.

      gorgolaphas: gorgon-jeqwI’ vay’; gorgon nach mIv’a’ ghajbogh vay’.

      gorgophonus: pe’vIl gorgon HoHpu’bogh vay’.

      gymnasousa kore: pIqcho’ ghaHbogh be’Hom’e’/wej tlhoghpu’bogh be”e’.

      hellotia/hellotis/ellotia/ellotis: corinthDaq athena quvmoHlu’taHvIS, pongvam cha’DIch lo’lu’ je. marathonDaq Sum pIrbogh puH yIQ, ‘ej pa’ athena lulIgh quv tu’lu’; pIrbogh puH yIQ DelmeH ‘elaDya’ Hol, helos mu’ lo’, vaj mu’vammo’ athena pongvam cha’DIch qonlu’pu’. Hochvam SovmoH pindar rIchwI’, ‘ach latlh nger tu’lu’ je. hellotia pong (wa’ timander puqbe’ ghaH hellotia‘e’) ‘oH pongvam cha’DIch mung’e’. corinth lumeQchu’pu’DI’ dorians, toD’eghmeH hellotia, athena chIrgh jaHpu’, ‘ach tagha’ pa’ hellotia eurytione (hellotia be’nI’) je luHoHlu’pu’. ghIq, qaSpu’DI’ poH ngaj, corinthDaq narghpu’ rop’a’. hellotia eurytione je qa’ lujotqa’moHbe’lu’chugh, mevbe’ rop’a’vam, ‘ej athena hellotis lulIgh quv chenmoHlu’ net poQ; ngugh Hochvam SovmoHpu’ Qun chabal ‘otHa’wI’.

      hippelateira: Sarghmey SeHwI’.

      hippia/hippeia/hippius/hippeios: Sarghmey vay’. ‘op Qun pong cha’DIch ‘oH pongvam cha’DIch’e’. be’ ghaHchugh Qun’e’, hippia/hippeia lo’lu’, ‘ej loD ghaHchugh Qun’e’, hippius/hippeios lo’lu’. hera pong cha’DIch ‘oH, poseidon ares je pong cha’DIch ‘oH je, ‘ej athensDaq tegeaDaq olympiaDaq je athena quvmoHlu’taHvIS, pongvam cha’DIch lo’lu’ je.

      hippolaitis: laconia hippola vay’. laconia hippolaDaq athena pongvam cha’DIch lo’lu’ je.

      hoplochares: nuHmeymo’ belqu’choHbogh vay’.

      hoplophorus: nuHmey qengbogh vay’; SuvwI’.

      hormasteira: bIDuvmeH, DutungHa’bogh vay’.

      hygeia: pIv vay’; ghu’vam bop pongvam cha’DIch.

      iasonia: cyzicusDaq athena quvmoHlu’taHvIS, pongvam cha’DIch lo’lu’ je.

      ilia: ilios (troy) vay’.

      itonia/itonias/itonis: phthiotis tIng chan tIngDaq iton veng tu’lu’, ‘ej vengvam pong ‘oH pongvam cha’DIch mung’e’. pa’ athena lulIgh quv loplu’bogh tu’lu’, ‘ej pa’ qaS je yupma’mey. itonvo’ boeotiaDaq copais ngeng luDechbogh DaqDaq je pongvam cha’DIch athena lalDanHom qenglu’pu’, ‘ej pa’ (athena chIrghDaq SorDaq lupochlu’pu’bogh je) pamboeotia loplu’. ‘ach pongvam cha’DIch mung bopbogh latlh nger tu’lu’; vay’ tu’lu’, voDleH maqlegh ghap ghaH, itonus ‘oH pongDaj’e’, ‘ej nuvvam pongmo’ itonia pong cha’DIch ponglu’pu’.

      itonia: itonus (thessaly) vay’.

      itonia: itonus (boeotia Sub) vay’.

      laphria/laphraia: wa’ latlh athena pong cha’DIch ‘oH.

      larisae/larissaea/larissaia: achaea larisus bIQtIq vay’. elis achaia je jojDaq larisus/larissus bIQtIq tu’lu’, pa’ athena lulIgh quv tu’lu’, ‘ej bIQtIqvammo’ pongvam cha’DIch qonlu’pu’.

      leitis: noH tevmey wavbogh vay’, ‘ej ghIq Hoch nuvvaD ‘op tevvam nob.

      lindia: rhodes ‘ambayDaq lindus veng tu’lu’, ‘ej pongvam cha’DIch mung ‘oH vengvam pong’e’. lindusDaq athena chIrgh loplu’bogh tu’lu’.

      longatis: longas vay’. wa’ boeotia yoS tu’lu’, yoSvamvaD longas ponglu’, pa’ athena quvmoHlu’ je, vaj yoSvam pongmo’ pongvam cha’DIch qonlu’pu’; Hochvam SovmoH tzetzes, ‘ach yoSvam bopbogh De’ tu’lu’be’.

      lyteira kakon: qalwI’mo’ mIghwI’mo’ joq Qob tu’lu’taHvIS, toDbogh vay’.

      macaera: Quchchu’bogh vay’, ‘ej Do’bogh; vay’ quvmoHlu’bogh je.

      magarsia/magarsis: pyramus bIQtIq ‘ay’ QavDaq Sum sicily magarsos veng, ‘ej pongvam cha’DIch mung ‘oH vengvam pong’e’. pa’ athena lulIgh quv tu’lu’.

      mater: SoS.

      mechanitis/mechaneus: ‘oghmeH laH vItlh vay’; nabmey janmey je ‘oghwI’. loD ghaHbogh Qun’e’ bopchugh pongvam cha’DIch, mechaneus lo’lu’, ‘ej be’ ghaHbogh Qun’e’ bopchugh, mechanitis lo’lu’. argosDaq zeus quvmoHlu’taHvIS, pongvam cha’DIch lo’lu’ je, ‘ej megalopolisDaq aphrodite athena je luquvmoHlu’taHvIS, pongvam cha’DIch lo’lu’ je.

      megalonymus: pong Dun Qun HoSghaj. ghob nuv ghaHchugh vay”e’, nuvvam Qej Qunvam, ghaHvaD jup Dam, ‘ej ghaHvaD ngay’ ghajmoH.

      munogenes: wa’ qaytu’ neH vay’.

      narcaea: narcaeus vay’. dionysus narcaea je puqloD ghaH narcaeus‘e’, ‘ej elis Sub ghaH. elisDaq athena narcaea lulIgh quv cherpu’, ‘ej pa’ nuvpu’vaD dionysus lalDanHom ghojmoHpu’.

      nedusia/nedousia: nedon bIQtIqDaq athena nedusia lulIgh quv tu’lu’, ‘ej bIQtIqvammo’ athena pongvam cha’DIch qonlu’pu’. kos ‘ambayDaq poieessaDaq latlh athena nedusia lulIgh quv tu’lu’ je. lulIghvam quv cha’DIch bop lutvam Harbogh ‘op: troyvo’ kos cheghpu’DI’ nestor, lulIghvam quv cherpu’, ‘ej nedon (laconia Daq) ‘οΗ pongvam cha’DIch mung’e’.

      nice/nike: yay. athena pong cha’DIch ‘oH je nice/nike pong’e’, ‘ej megara acropolisDaq pongvam cha’DIch athena lulIgh quv tu’lu’.

      nikephorus daemon: yay chavbogh Qun.

      obrimopatre: vav HoSghaj puqbe’.

      ombrimothymus: qa’ HoSghaj vay’.

      onca/onka: boeotia oncae vengDaq athena lulIgh quv tu’lu’, ‘ej vengvammo’ athena pongvam cha’DIch qonlu’pu’.

      ophthalmitis: mInDu’ vay’.

      oxyderces: leghmeH laH vItlh vay’; valqu’bogh vay’.

      paeonia/paionia: vorbogh Qun. athensDaq athena paeonia/paionia Hew tu’lu’, ‘ej oropusDaq amphiaraus chIrghDaq pongvam cha’DIch athena ‘anmoHmeH qachHom tu’lu’ je.

      pallantias: wa’ athena pong cha’DIch ‘oH pallas‘e’, ‘ej pallas Sar ‘oH pallantias pong cha’DIch’e’.

      pallas: latlh athena pong cha’DIch ‘oH je pallas‘e’. ghu ghaHtaHvIS zagreus‘e’, pe’vIl Hoch porghDaj ‘ay’ luchevpu’ titans, ‘ach ngugh tIqqu’bogh tIqDaj toDpu’ athena, ‘ej ngoDvammo’ athena pongvam cha’DIch qonlu’pu’. {tIqqu’} wot DelmeH ‘elaDya’ Hol, pallesthe/palein/pallo wot lo’, vaj pallas pong cha’DIch mung yajlu’. zagreus lubopbogh wanI’vam SovmoH orpheus ‘ay’Hom wejmaH vagh. ‘ach pongvam cha’DIch bopbogh latlh De’ tu’lu’ je. pallas lo’taHvIS homer, reH athena pong lo’ je, vaj roD pallas athena jatlh homer. ‘ach pallas neH lu’lo’ je ‘op qonwI’ veb. pongvam cha’DIch QIjmeH plato, ‘otHa’: SuvruptaHvIS athena, pe’vIl naQjej/aegis tavmoH, ‘ej {pe’vIl tavmoH} DelmeH ‘elaDya’ Hol, pallein wot lo’. ngoDvammo’ pallas pong cha’DIch qonlu’pu’ (cratylus tenwal loSvatlh javDaq Hochvam SovmoH plato). ‘ach vay’ pIm SovmoH apollodorus: pe’vIl pallas giant HoHpu’bogh athena ‘oH pongvam cha’DIch mung’e’. ‘ej latlh nger Delpu’ vay’: rap pallas pallax je, ‘ej {not vay’ ngaghpu’bogh be’}/{be’Hom/wej tlhoghpu’bogh be’} Del ‘elaDya’ wot pallax.

      pallenis: latlh athena pong cha’DIch ‘oH. athens marathon je jojDaq athena pallenis chIrgh tu’lu’.

      panachaea/panachaia: achaea Hoch Qun; Hoch achaeans Qun. achaia aegaeDaq demeter quvmoHlu’taHvIS, pongvam cha’DIch lo’lu’ je, ‘ej laphiriaDaq athena quvmoHlu’taHvIS, pongvam cha’DIch lo’lu’ je.

      pancrates: HoSghajchu’wI’.

      pareia: laconiaDaq athena pareia Hew tu’lu’, ‘ej parian mISjennegh yugh Hewvam. vaj chaq ngoDvammo’ pongvam cha’DIch qonlu’pu’.

      parthenos/parthenus: not vay’ ngaghpu’bogh be’. athensDaq athena quvmoHlu’taHvIS, ghaHvaD athena parthenos ponglu’ je. pa’ athenavaD parthenon chIrgh noy chenmoHlu’pu’.

      philentheos: vay”e’ luSIghchu’bogh Qun.

      philopolemic: noH muSHa’bogh vay’. veng Hubmo’ athena, pongvam cha’DIch qonlu’pu’.

      phlegraeon oleteira giganton: phlegraean giants Qaw’wI’.

      phygodemnios: tlhogh QongDaq muSbogh vay’.

      phygolectros: tlhogh QongDaq ghoSbe’bogh vay’.

      polemoclonus: noH wab vItlhchoHmoHbogh vay’.

      polemodocus: noH vanbe’moHbogh vay’.

      polemotocus: noH qaSmoHbogh vay’.

      polias: veng vay’, veng Qanbogh Qun. athensDaq athena quvmoHlu’taHvIS, pongvam cha’DIch lo’lu’ je. pa’ athenavaD acropolis Qanbogh Qun Damlu’.

      poliatis: veng QanwI’.

      poliuchos/poliouchos: veng Qanbogh vay’. ‘op Qun pong cha’DIch ‘oH. spartaDaq athena chalcioecusvaD athena poliuchos ponglu’ je, ‘ej athensDaq athenavaD athena poliuchos ponglu’ je.

      polybulus/polybulos: law’bogh qeS chul vay’, chulchu’bogh vay’.

      polyllistus: nuvDaq SaHmeH vay’, vay’vamvaD mu’ law’ jatlh nuvvam. Sarvam vay’ Del pongvam cha’DIch.

      promachorma: Daqav QanwI’, rIjchoHmeH Daq HubwI’. hermioneDaq Sum buporthmos HuD. pa’ pongvam cha’DIch athena lulIgh quv tu’lu’.

      pronaea/pronaia: chIrgh ‘ay’ wa’DIch vay’. delphiDaq apollo chIrgh tlhopDaq athena chIrghHom tu’lu’. hermesvaD hermes pronaus ponglu’ je.

      pronoea: tuch wanI’mey SovlaHbogh vay’.

      rete: athena orpheus bomDaq athena Dellu’meH, rete mu’ lo’lu’; {vay’ Dellu’bogh}/{vay’ Sovlu’bogh}/{noybogh vay’} yajmoH ‘elaDya’ mu’vam. ‘ach orpheus bomvam rapDaq -SIbI’ rete mu’ jatlhlu’pa’- athena Dellu’meH, arretus mu’ lo’lu’ je, ‘ej Dop cha’ ‘elaDya’ mu’vam. vaj athena luDel wa’ mu’ latlh mu’ je.

      saitis: argolis lernaDaq Sum pontinus HuD, ‘ej pa’ athena lulIgh quv tu’lu’. pongvam mung luyajmeH ‘elaDya’ngan, nIDtaHvIS, tagha’ maSIr qun/lalDan nuDpu’, ‘ej tu’pu’: pa’logh athenavaD sais lupong maSIrngan.

      salpinx: noH nItlh gheb.

      scillyntia: elis scillus vay’.

      sciras/skiras: salamis sciras vay’, sciron (salamis Sub) vay’. attica phaleron verghDaq salamis ‘ambayDaq je pongvam cha’DIch athena chIrgh tu’lu’. qaStaHvIS scirophorion jar, athena luquvmoHmeH athenians, athensDaq yupma’ lulop, ‘ej yupma’vamvaD skiraphoria luponglu’. phaleron athena sciras chIrgh cherpu’ tuch rItwI’ ghaHbogh dodona scirus‘e’ ‘e’ SovmoH pausanias, ‘ej erechtheus voDleH luSuvtaHvIS eleusinians, attica pawpu’ scirus net Har.

      semne: quvchu’bogh vay’ ‘ej Qun DI’onmey chIwchu’bogh. Dunqu’bogh vay’ ‘ej chuQun DI’onmey ‘aghbogh.

      soteira: toDwI’, tlhabmoHwI’. athena pong cha’DIch ‘oH, ‘ach latlh Qunpu’ pong cha’DIch ‘oH je: artemis, arcadia laconia je persephone, eunomia.

      sthenias: HoS vay’, HoSbogh vay’.

      sunia: attica sunium vay’.

      technon meter: meHghem SoS.

      telchinia: cyprus telchinia vay’.

      tithrone: pongvam cha’DIch bopbogh De’ tu’lu’be’.

      tritogeneia/tritogenes/trito: pongvam cha’DIch QIjlaHchu’ pagh; nger law’ tu’lu’. DaqDaq boghpu’ athena, ‘ej lIbya’ triton ngengDaq Sum Daqvam ‘e’ luHar ‘op, ‘ach boeotia triton bIQtIqHomDaq Sum Daqvam ‘e’ luHar latlh; vaj triton ngengmo’ triton bIQtIqHommo’ ghap pongvam cha’DIch qonlu’pu’. wejlogh boghpu’bogh vay’ Del pongvam cha’DIch ‘e’ luHar ‘op, ‘ej athamania Hol Sar trito mu’mo’ pongvam cha’DIch qonlu’pu’ ‘e’ luHar latlh, {nach} Delmo’ trito, ‘ej zeus nachvo’ boghpu’mo’ athena.

      tritonis: tritogeneia tritonia je pong cha’DIch rur pongvam cha’DIch.

      xanthe: SuD athena jIb ‘ej wov, qol’om/tIr rur net Har, vaj ghaHvaD athena xanthe ponglu’ je, jIb Sarvam be’ DelmeH ‘elaDya’ Hol, xanthe mu’ lo’mo’.

      xenia: be’ ghaHbogh Qun’e’ bopchugh pongvam cha’DIch, xenia lo’lu’, ‘ach loD ghaHbogh Qun’e’ bopchugh, xenios lo’lu’. vaj athena Dellu’meH, athenia xenia jatlhnISlu’, ‘ej zeus pong cha’DIch ‘oHmo’ je, zeus Dellu’meH, zeus xenios jatlhnISlu’. novpu’ Qanmo’ athena zeus je, ‘ej mebpu’vaD jup Da juH ghajwI’ ‘e’ lurangmo’ athena zeus je, Qunvam luDellu’meH, pongvam cha’DIch lo’lu’.

      zosteria: vay”e’ Dechbogh SIryoD. be’ ghaHbogh Qun’e’ bopchugh pongvam cha’DIch, zosteria lo’lu’, ‘ach loD ghaHbogh Qun’e’ bopchugh, zosterius lo’lu’. athena luquvmoHtaHvIS epicnemidian locrians, ghaHvaD athena zosteria ponglu’ je. atticaDaq phaleron sunium je botlhDaq tIqbogh puH ‘ay’ ‘ej langbogh tu’lu’, ‘ej puH ‘ay’vamDaq yItchugh vay’, tagha’ bIQ’a’ paw; pa’ puH ‘ay’vamDaq apollo quvmoHlu’taHvIS, ghaHvaD apollo zosterius ponglu’ je.